شعــــــرك ليــــــل

لو غاب الكمر
يستاحش الليل
يبات ابغيض سكته
وتزعل طيوفه
يبو عيون التواكح
وحشة الليل
ويبو طول الحلو
ومحلي الشوفه
بعد شعرك ليل
وخدودك نهار
وبعد ذاك الحنين
وروح ملهوفه
وبعد ترفه الروح
وتعب اليلوم
وبعد فيض الحنين
يلاعب جروفه
اخاف عليك
من عين اليحسدون
هوايه عيون
وانت عيون مكشوفه
خيالي اسنين
ضيف بروضتك خطار
وروحي عليك
ما يحتاج معروفه
ياطعم العسل
يانفحة النعناع
ياهيل الدلال
معطر ضيوفه
شوك
وجفوف الفرح
من تعتنيك
بلهفة المشتاك
لاكي جفوفه
ارضه شما تريد
وعني اتكول
ورضيك بوصف
متكرره حروفه
على جروف المحبه
زرعنه غصنين
غصن بيه انتباهه
وغصن منعوفه
عشك ضي الكمر
ليل المحبين
صواني شموع عيد
وحنه مديوفه
ولبس ثوب العرس
وزينت الروح
عريس الكلب
والروح مزفوفه
عريس الكلب
والروح مزفوفه