تلوم الناس بيه وانه ميت بيك ...

تهيم الروح حبيبي من يمر طاريك

واكضي الليل بين الاه والحسره

بين الناس كلبي ياحلو مغليك

تغلى ياحبيبي بداعة العشره

وتدلل روحي اطلب وانه انطيك

واذا كلبي اعتذر لاتقبل بعذره

علمت الدمع ينزل من افكر بيك

وعلمت الجرح من شوفتك يبره

وعلمت العشق من يسالون عليك

يكلهم بالحسن من يوصل لقدره

وعلمت الورد يبوك العطر من خديك

وياخذ بوسه منه ويهرب بعطره

وعلمت الطيور تهاجر لشاطيك

تسكن رمش عينك وتترك الشجره

وعلمت البحر من تعطش يمر عليك

يعوف امواجه كلهه وشاطئه وجزره

وعلمت الخمر يسكر من يمس شفتيك

لان حتى الخمر شفافك اتسكره

تلوم الناس بيه وانه ميت بيك

وانا المفتون بالخطوات والنظره

لان خطوتك بيهه الف تكتيك

وانه التيهت عد الواحد وعشره

انا المفتون من راسك لحد رجليك

يميل الكون حبيبي من يميل خصره

هم حلو هم شفاف هم ذايبه روحي بيك

وكل الناس ياغالي بيك منبهره

تدلل روحي اطلب انه انطيك

فدوه الروح لك ولجمالك وسحره